الجزء الاخير من حلقة سجاير الخوابير خير بديل

الجزء الاخير من حلقة 

سجاير الخوابير - خير بديل 

لمتابعة الاجزاء السابقه 

الجزء الاول

الجزء الثاني

الجزء الثالث

مشهد 19

المكان :

بيت سمسم

الحاله :

ميمي رايح يقول لابوه وامه

ميمي / وربنا يا عمي ده اللي حصل احنا معملناش اكتر من كده

ام سمسم / يستاهل اللي يحصله شالله اشوفهم عادمينه

ابوه / يعدمو مين يا وليه بس .. وابن الجزمه ده مقاليش ليه هو مش عارف اني خرمان من يوم ما منعو المرحومه

ميمي / يا عمي احنا في ولا في ايه

جرس الباب يضرب وتدخل سومه

سومه داخله بتعيط

سومه / ميمي .. سمسم جراله ايه يا ميمي ده صوره نزلت في الجرنال

ميمي / نعم ؟ جرنال ايه هما لحقو

سومه / والله العظيم لقيت واحده صحبتي بعتالي الخبر من علي موقع اليوم السابع وفيه صورة سمسم وراجل كده بدقن وواحد كمان ايه اللي حصل يا ميمي انطق

ترد ام سمسم :

ــ بيبيعو سجاير

سومه / منا عرفت .. اتمسكتو ازاي يا ميمي وانت كنت فين

ميمي / انا كنت واقف علي كرسي عشان كده شوفت البوليس وهو جي  وقومت جاري وقولت لسمسم اجري بس هو اللي اتثبت مكانه

سومه / طبعا مهو علي نياته

ميمي / والنبي بئا بطلي حكاية علي نياته دي يا بنتي وربنا ما في ولد علي نياته

سومه / مهو الكلام لما يطلع من واحد زيك يبئا لازم اتأكد ان في كتير علي نياتهم

يتدخل ابو سمسم

ـ احنا هنهزر بئا ولا ايه ما تخرسو بئا .. قومي البس يا ام سمسم عشان نروح نشوف ابنك .. بس اما اشوفه ابن الكلب ده .. يبيع سجاير وميدنيش سيجاره واحده

ــــــــــــــــــــــــ

مشهد 20

المكان قدام القسم

الحاله :

ألاف مؤلفه واقفه تهتف لسمسم ولحرية سمسم

ابو سمسم / ايه ده ياض يا ميمي .. انتو كنتو بتبيعو سجاير ولا اعلام مصر

ميمي / والله ما اعرف يا عمي

يدخل ابو سمسم وميمي وسومه وام سمسم وعمرو اخو ميمي وسط الزحمه ويحاولو يشوفه ايه اللي بيحصل قدام

يلاقو سمسم واقف يتكلم مع التلفزيون وفرحان وقاعد يرفع ايده بعلامة النصر

ام سمسم / ابني .. ده بيتكلم في التلفزيون يا حلاوه .. طالع لامه

ابو سمسم / طالع لامه ؟ والنبي ايه .. مش ده اللي كنتي عايزهم يعدموه

ام سمسم / فشر يعدموه ايه انا ادعي علي ابني واكره اللي يقول امين

ينده ميمي لسمسم بصوت عالي ( يا سمسم يا سمسم ابوك وامك جم يا سمسم )

ـــــــــــــــــــــــ

مشهد 21

المكان :

منصه واقف عليها سمسم وماسك مايك عشان يخطب في الناس

سمسم :

ـ اخواني .. اخواني .. احنا خلاص خرجنا براءه انا بشكركم جداا بشكركم جدااا .. وانا بوعدكم اني هفضل ورا الموضوع لحد ما يرجعو المرحومه لينا تاني .. ولحد ما القرار ده يطلع بعودة المرحومه هيستمر اختراعي شغال وكلكم هتشربو سجاير الخوابير

يوشوشه الحج بدوي :

ـ يا سمسم البخور كله اتحرز وخدوه كله

يلف سمسم ويكمل كلام :

ـ حتي لو خدو البخور كله معندناش مشكله .. انا عندي اكتر من 50 طريقه لاختراع السجاير

( يهيص الناس ويهتفو .... ياواد يا سمسم يا خطير رجعلنا سجاير الخوابير )

ـ بعد اذنكم بعد اذنكم ... نهدي شويه .. انا بقترح ان احنا الفتره الجايه نمشي علي سباخ الحمير والقش دول بيعملو اعلي دماغ واسألو مجرب ولا تسألو دكتور .. انا مقدر هذه المسؤليه التامه .. وخدمه مني للي عملتوه معايا ده والواقفه اللي وقفتوها مع ابن من ابنائكم .. انا برشح نفسي لمجلس الشعب .. مجلس شعب ايه انا بقول ايه .. معلش معلش اندمجت شويه .. اللي عايز اقوله ان وزير الداخليه كلمني جوه قبل ما اخرج وقالي انه صعد الموضوع للرئاسه وان شاء الله هيجيلنا رد علي عودة المرحومه مره تانيه

يرن تليفون سمسم في جيبه

ـ هدوووووووووء هدووووووووووء .. في برايفت نمبر بيتصل اكيد ده وزير الداخليه هدووووء

يسكت الجميع

سمسم :

ـ الو مين معايا .. يا نهار اسود

كل الناس ترد ( ميييييييييين )

ـ ده الريس الريس يا ولاد الجزمه الريس هتودونا في داهيه اسكتو شويه .. ايوه يا ريس تحت امر معاليك .. احنا شاكرين ليك افضالك يا ريس .. طبعا يا ريس الشعب كله عارف انك بتحب تظبتنا ... ياريس طول ما الدماغ عمرانه جيوبكو بإذن الله عمرانه .. تحت امرك يا ريس هقول للشعب حاضر .. انت كمان يا ريس ؟ انت مش بتشرب سيجار .. الخوابير عجبتك ؟ .. وماله ياريس اعملك خوابير يا ريس علي عيني ياريس حاضر .. كل واحد م الشعب هديله خابور ونجيلك كلنا مع بعض ياريس عشان تعرف شعبك بيحبك قد ايه .. حاضر يا ريس من عنيا الاتنين .. اه بقولك ياريس .. والنبي انا عليا اتنين جنيه ونص لموبينيل مستلفهم ومش عارف اشحن لو تكلملي ساويرس يجدولهوملي يبئا كتر خيرك .. تحت امرك يا ريس .. مع السلامه مع الف سلامه

ـ يا رجاله .. عندي خبر حلو

يرد الجميع ( هاااااااااااا )

ـ المرحومه

( هاااااااااا )

ـ رجعععععععععععععععععععععععععععععععععععععععتتتتتتتتتتتتتتتتتتتتتتتتتتتت

يهيص الناس واللي يبوس التاني والكل ياخد بعض بالاحضان والعساكر قدام القسم يضربو نار من الفرحه والعمليه بقت بزراميت

يطلع واحد من اللي واقفين ينده علي سمسم

( بقولك ايه يا سي سمسم .. مدام الشعب اتجمع بئا ع الكيف .. يبئا مش ماشيين غير لما الحشيش يرخص ويرجع يتباع تاني في المحلات )

تحصل حاله من النقاش وسط اللي واقفين وبعدين يهتفو

( يا سمسم قول للشواويش ... يقول للريس عايزين حشيش )

( يا سمسم قول للشواويش ... يقول للريس عايزين حشيش )

( يا سمسم قول للشواويش ... يقول للريس عايزين حشيش )

سمسم :

ـ احنا في بلد ديمقراطي يا جماعه .. وكل اللي عايزينه هيحصل انا بعلن من هنا استمرار الاعتصام .. ومفيش مرواح غير كل واحد معاه كف حشيش

يهيص الناس ..

يرن تليفون سمسم

ـ ايوه مين

يرد الناس ( هااااااا ميييييييييين )

ـ بس بس ده الريس تاني .. شكله هيصاحبني ولا ايه مش فاهم اخرسو بئا

ـ ايوه يا ريس .. لا يا ريس في شوية مشاكل صغيره كده ان شاء الله هتتحل والكل يروح بيته قبل المغرب .. بس يا ريس ده اخر مطلب .. ازاي مينفعش يا ريس واحنا مالنا بالكلام ده الشعب وعايز حشيش نقوله لاء ؟ .. بص يا ريس الشعب معاك

يوجه سمسم التليفون للناس ويهتفو الناس

( يا سمسم قول للشاويش يقول للريس عايزين حشيش )

يرفع التليفون تاني علي ودنه

ـ ايوه ياريس سمعت بودانك .. احنا يا ريس تقريبا 100.000 يعني ممكن نقعد هنا العيد الكبير .. كده يا ريس ؟ عموما انت عملت معانا الواجب ومش مهم الحشيش .. انا هجيب الشعب وجاينلك بالخوابير استعد يا ريس

www.fb.com/asb.abdo

www.fb.com/semsomyat

www.abdosami.blogspot.com

الجزء الثالث من حلقة سجاير الخوابير خير بديل

الجزء الثالث من حلقة 

سجاير الخوابير - خير بديل 

تابع اول الحلقه من خلال 

الجزء الاول

الجزء الثاني

مشهد 12

المكان :

محل الحج بدوي

الحاله :

قاعد سمسم بيعمل الخلطه بتاعته وبيلف هو وميمي والحج بدوي السجاير ومعاهم ابن الحج بدوي بيحط كل 4 سجاير في كيس السجاير الموضه الجديده اللي عمله الحج بدوي .

سمسم / ولاعه يا ميمي

ـ يطلع ميمي الولاعه ويديها لسمسم ويحط سمسم السيجاره اللي لسه لاففها في بوئه ويولع

الحج بدوي / انت بتعمل ايه يا ابني هو احنا لسه استفتحنا

سمسم / مش اما استفتح انا الاول .. بس ايه رائيك في الريحه بذمتك مش اختراع لذيذ

ابن الحج بدوي / الريحه تهبل

ـ يلتفت الحج بدوي ويبص لابنه ويبرقله كده

ميمي / المهم دلوقت احنا بقالنا اربع ساعات وملفناش غير 150 سيجاره .. هنفتح امتي ونعرف الناس

سمسم / حالا يا عم بس لف انت لف

ميمي / ما تشغلنا اغنيتين يسلونا

الحج بدوي / اغاني !! ... اهو ده اللي ناقص ان الاغاني تخش محل الحج بدوي

ميمي / حوش حوش .. تحب نجيبلك اغاني مش حلال هههههههههه

يضحك سمسم وابن الحج بدوي بصوت عالي يرجع الحج بدوي يلتفت ويبرق لابنه

ـــــــــــــــــــ

مشهد 13

المكان :

وجهة المحل بعد ما نصبو المكان اللي هيقفو يبيعه عليه

الزمان :

بعد الضهريه لما خلصو لف

الحاله : ميمي هو وابن الحج بدوي بيعلقو اليافته .. ( يوجد سجاير الخوابير  )

سمسم / قرب قرب قرب ... قالو السجاير اتمنعت واحنا بنقول علي نفسهم .. قرب يا بيه وخدلك نفس قرب قرب قرب .. الـ 4 سجاير بـ 10 جنيه بس حاجه ولا في الاحلام .. قرب قرب قرب

يتلم كل الناس قدام المحل وكلهم مستغربين من حدودته الحج بدوي يبيع سجاير ونبص نلاقي واحد جاي يكلم الحج بدوي يقوله

ـ هي وصلت انك تبيع سجاير يا حج

ونلاقي واحد تاني بيرد عليه

ـ بس خااااااااااالص .. مش عايز روح امشي ياض من هنا ... هاتلي 8 يا ريس

سمسم / هما 4 بس لكل واحد احنا جايين ندلع الشعب كله ..قرب قرب قرب

ـ وسط الزحمه يلاقو عسكري شرطه جاي من بعيد واقف وسط الناس ميمي يخاف ويقول لسمسم .. يستمر سمسم في النده علي الناس عشان تشتري

ميمي / يا دفعه .. عايز حاجه ؟

العسكري / عايز سيجارتين بخمسه جنيه بس

سمسم / لاء يا دفعه الاربعه ب10 علي طول انتو اللي حطيطونا في الموقف ده شيلو بئا

العسكري / ياعم وانا مالي انا دي قرارات الناس اللي فوق وهما اصلا ناس حشاشه بس عايزين يبانو انهم بيخدمو الشباب .. هات سيجارتين بئا

ميمي / خلاص يا سمسم عشان خطري انا اديله اتنين

ـ ياخد العسكري السيجارتين ويروح يقف علي جنب يولع السيجاره والطريق باظ خالص الكل بيقف وييجي يشوف ايه اللي بيتباع ده والكل بيطير من الفرحه لما يلاقي اللي بيتباع سجاير

ـــــــــــــــــــــ

مشهد 15

وصل الاخ بتاع امبارح اللي اخد منهم العنوان ع الكورنيش عشان يشتري وجاي واقف وسط الناس وقاعد ينده علي سمسم وميمي وهما مش سامعين من الزحمه

ـ يا رجاله انا بتاع امبارح يا رجاله .. يا رجااااااله انا بتاع امبارح

يرد عليه راجل واقف جنبه :

ـ هو ايه اللي حصل امبارح ؟

الواد / محصلش حاجه

ـ / خلاص اترمي علي جنب زيك زينا ولا عايزين تعملو كوسه كمان هنا

ـــــــــــــــــــ

مشهد 16

الحاله :

الشارع مقفول من اوله لاخره والكل بيضرب بعض عشان يخش يشتري سجاير

علي الجنب نلاقي راجل كبير في السن ماسك الموبايل وبيتكلم :

ـ الحقونا يا باشا .. الشارع كله مقفول وفي مجازر هنا علي السجاير .. الحقو الناس يا باشا ..

العنوان ........... كذا كذا كذا

ــــــــــــــــــــــــ

مشهد 17

·       وصلت الشرطه واتفتح الطرق ليها ودخلو علي الزحمه لحد ما وصلو لمصدر الزحمه

عربية أمن مركزي كامله نزلت عملت كردون حوالين المنصه بتاع الدكان اللي بيتباع عليها السجاير

الحج بدوي / يالهوي .. الشرطه جت روحت في داهيه يا بدوي

الظابط / وسع يا ابني انت وهو وسع ... ايه الزحمه دي

ـ الله الله بتبيعو سجاير عيني عينك كده ... هاتلي يا ابني الناس دي علي البوكس

·       يهرب ميمي كعادته ويتمسك سمسم والحج بدوي وابنه .. ويتشمع الدكان وسط غضب الناس

ـــــــــــــــــ

مشهد 18

المكان :

قسم البوليس

الحاله :

سمسم والحج بدوي وابنه واقفين في جنب في اوضة المأمور

خمس دقايق ويخش راجل كده شكله مهم مش لابس لبس شرطه لابس البدله العاديه بس واضح ان الكل محترمه ومديله برستيجه من كلام العساكر وهو داخل عرفو ان هو لوا .

دخل اللوا قعد ع المكتب وولع سيجاره ( حاجه غريبه صح ) وسط زهول من سمسم والحج بدوي وابنه من المنظر وبدء التحقيق

اللوا / انتو بئا اللي بتتحدو البلد دي .. احنا مش قولنا خلاص معدش في سجاير

ـ يشم سمسم ريحة السيجاره اللي في ايد اللوا ويحس انه شمها قبل كده لحد ما يعرف انها نفس نوع السجاير اللي هو عاملها واللي الشرطه لمتها وجابتها معاهم

سمسم / ما حضرتك بتشرب

الحج بدوي / بس يخربيتك .. اشرب يا باشا براحتك لو عايزنا نلفلك سجاير احنا تحت امرك

اللوا / لا خليك انت علي جنب دلوقت انت موالك موال .. تعال انت ( وهو بيشير لسمسم )

ـ يقرب سمسم من المكتب

اللوا / واقف ليه ؟ .. ما تقعد

يقعد سمسم وسط زهول برضو من الحج بدوي وابنه

اللوا / قولي بئا جبت السجاير دي منين ؟

سمسم / مجبتهاش من مكان

اللوا / طب كويس والله .. افهم من كده انها هي اللي جتلك ؟

سمسم / ولا حتي جتلي

اللوا / اومال عملتها ازاي بئا يا بطل ؟

سمسم / نوع من انواع البخور كده من عند الحج بدوي كنت بجيبه واحط عليه شوية حجات صغيره كده واعجنهم وبعدين اسخنهم علي نار هاديه لمدة نص ساعه وبعدين اهويهم وافتتهم من تاني وابدء الف السيجاره

اللوا / طب ما انت دماغك حلوه اهيه .. ليه بئا مفكرتش ان ده هيسجنك وقعدت في بيتكو بعت لاصحابك ع الضيق كده ولا انت طمعت عشان تكسب كتير

يبص سمسم للحج بدوي ويقول :

ـ الله يسامحه اللي كان السبب

اللوا / ومين بئا اللي كان السبب ...

·       يقوم اللوا من مكانه ويروح يقف جنب الحج بدوي ويقول :

ـ اكيد ده صح

الحج بدوي / يا باشا انا معرفش الكلام ده متصدقش الحجات دي انا راجل بعرف ربنا انا لما وافقت اني ابيعه كان عشان كنت متأكد انها مش سجاير اللي بتبوظ الشباب وانها مش حرام

اللوا / لا والله ... ده علي اساس ان البخور ده مبيضرش المخ لما الشاب يتعامل معاه علي انه تبغ ... انتو مش متخيلين انتو عاملين ايه ولا تحبو افهمكم اكتر

ـ يقف سمسم مكانه ويقول :

ـ والله بئا دي مش غلطتنا .. دي غلطت اللي مبيفكرش غير في نفسه .. غلطت الاناني اللي بيحرم شعب كامل من حاجه هو عايش بيها وجزء من حياته

اللوا / ممممممم .. وايه كمان ؟ ... كمل

سمسم / منا لو كملت الكلام مش هيكون كويس .. هتفرح سيادتك اما تعرف اني كنت بشتري حشيش من ظابط عندكم في قسم الدقي ؟ .. هتفرح لما تعرف ان اكتر واحد كان بيسطبح معانا كان لوا زي حضرتك ... هتفرح سيادتك اما تعرف ان امناء الشرطه عايشين علي السجاير اللي بيخلو السواقين يشتروها ليهم .. طب اديكو منعتوها انت بئا تعرف السواقين بيدفعو قد ايه دلوقت لأمناء الشرطه إطاوه ؟ .... بلاش ده كله .. سيادتك تعرف كام ألف كانو واقفين عايزين يشترو ولو سيجاره واحده مننا ؟ .. بلاش الكام ألف .. سيادتك تعرف ان عسكري المرور ساب الطريق يولع بجاز وجاه وقف اتحايل علينا عشان نديله سيجارتين وخدهم وراح علي جنب يشربهم عشان محدش تاني يشوفو ويحاسبوه وفي نفس الوقت ساب الطريق يتشال يتحط .. ها يا باشا غلطة مين ؟

اللوا / غلطة مين ؟ ... وافرض يا اخي كل الكلام ده .. ليه بئا مش عايزنا نعدل من نفسنا

سمسم / تعدلو من نفسكو انكو تعاملو المواطن انه انسان ليه كرامه .. تعدلو من نفسكو انكم تخلو امين الشرطه يعامل الراجل والشاب اللي ماشي في حاله انه افضل منه مليون مره ... سيادتك احنا بنشرب حشيش وبنشرب سجاير وبنعمل كل حاجه .. بس احنا ولاد ناس ومتعلمين ومثقفين .. تقدر سيادتك تقولي حضرتك تعرف ايه عن العلم غير نظرية القانون اللي سيادتك واخدها في الكليه ده لو كنت فاكرها اصلا ؟

الحج بدوي / لالالالالالا بس يلا الله يخربيتك .. احنا أسفين يا باشا والله ما قصدنا

ابن الحج بدوي / لا مش أسفين يا حج .. سمسم بيتكلم صح .. سيادة اللوا حضرتك ممكن تقولي هو ايه اللي وصلنا ان كل واحد ماشي في الشارع ماسك في ايده سيجاره ؟ مش من الزحمه اللي انتو معيشينا فيها بحجة زيادة المواليد وقلة الوفيات والكلام الغبي بتاعكو ده .. ليه الراجل قبل ما ينام مع مراته لازم يشرب سيجاره مش من القرف اللي شايفه طول النهار ومطلوب منه اخر اليوم يأدي واجباته كامله في بيته .. ليه الطالب في الجامعه يكون طالع الاول وميلاقيش حتي وظيفه ومستغرب انه ماسك سيجاره او حتي يكون طالب نص نص ويصقت علي نص درجه ولا درجه وولادكو انتو ينجحو من غير ما يروحو الامتحانات

اللوا / واضح انكم حافظين كلام وجايين تسمعوني نصايح احنا في غني عنها

سمسم / احنا لا حافظين كلام ولا جايين ندي سيادتك نصايح .. انتو اللي جبتونا

اللوا / ماشي ..

يضرب اللوا مفتاح الجرس اللي علي المكتب ويخش عسكري بعد ما يضرب التمام يا فندم بتاعته يرد اللوا

ـ خدهم ع الحجز .. حبس انفرادي لكل واحد فيهم دي قضية رأي عام .. وخش لسمير بيه قوله اني بكلفه بمأمورية ضبط واحضار الولد الرابع اللي كان معاهم

·       اما انتو بئا يا اساتذه يا حلوين .. فياريت تثبتو علي رائيكم ده ايامكو الجايه اعتقد انها مش هتبئا لذيذه

ـــــــــــــــــــــ

الي اللقاء في الجزء الاخير 

تابعونا علي 

www.fb.com/semsomyat

www.fb.com/asb.abdo

www.abdosami.blogspot.com

الجزء الثاني من حلقة سجاير الخوابير خير بديل

الجزء الثاني من حلقة 

سجاير الخوابير - خير بديل 

الجزء الاول من الحلقه 

اضغط هنا

مشهد 6

المكان :

أوضة سمسم

الحاله :

بيلبس الجزمه وبيشرب اخر سيجاره معاه ..

ـ يتصل ميمي بيه

ميمي / انت فين يا زفت

سمسم / انا نازل اهوه

ميمي / طب مدام هتتأخر مقولتش ليه اجي ع البيت

سمسم / يا ابني عايز تييجي ع البيت عشان تعرف الاختراع .. لا يا حبي من اليوم ده الاوضه دي بقت معمل ومحدش هيخشها غيري انـــــا .

ميمي / ماشي يا سي الدكتور .. اخلص الشوارع ضايعه .. كل الناس بتضرب في كل الناس .

سمسم / امسك نفسك انتي علي ما اجيلك

ـــــــــــــــــ

مشهد 7

المكان :

في الشارع

الحاله :

ميمي لقا عقب سيجاره مرمي جنب الرصيف زي ما يكون مرمي من ايام الهكسوس .

·       بص ميمي يمينه وشماله وراح ولسه هيمسك عقب السيجاره لقا عيل صغير قدامه .

العيل / انت بتعمل ايه يا حلو .. دي أرضنا وده عوقبنا

ميمي / عوقبكو مين يا ابني انا اللي شايفه الاول .

العيل / ملناش فيه .. انت هتسيب العوقب ولا انده الجيش ؟

ميمي / هو الجيش نزل الشوارع ؟ .. للدرجه دي البلد باظت بعدك يا مرحومه .

العيل / لا يا حلو ده الجيش بتاعي انا .. انده ولا هتسيب .

ميمي / لا وعلي ايه .. خده يا عم واتوكل .

ــــــــــــــــــــ

مشهد 8

المكان :

الشارع .

الحاله :

سمسم وصل ونزل من العربيه لميمي .

سمسم / هــا .. جبت الـ 100 جنيه .

ميمي / ما تبطل وساخه بئا يلا .. هما 20 جنيه اللي معايا واتنين جنيه هركب مترو اروح بيه .

سمسم / تؤ .. استغفر الله العظيم يارب .. هو كان كلام عيال ولا كلام عيال .

ميمي / وحياة ابوك يا سمسم بيه انجدني انا خلاص بموت .

·       يقرب ميمي من سمسم ويقعد يبوس كتفه

·       ـ عشان خطري والنبي والنبي عشان خطري .

سمسم / عليه الصلاة والسلام .. خلاص بس لو مكنتش صحبي الأنتيش .. هات الـ 20 جنيه وأمري لله .

ميمي / طب ما تخليهم 10 .

سمسم / ورحمة أبويا في أوضته يا ميمي .. لو مطلعت الـ 20 جنيه لسيبك وماشي .

ـــــــــــــــــ

مشهد 9

المكان :

محل العطاره

الحاله :

ميمي داخل مع سمسم علي المحل وهو فرحان .

سمسم / سلامو عليكو يا حج بدوري

الحج بدوري / أهلا أهلا بالشباب .. ايه يا سمسم مشوفتكش امبارح يعني .. د ه انت بقالك شهر كل يوم عندي .

سمسم / معلش بئا يا حج بدوري ظروف المهم .. الطلب موجود ؟

الحج بدوي / موجود طبعا .. بس لو تقولي بتاخد البخور ده كله تعمل بيه ايه ؟

ميمي / بخور !! ... ازاي مجتليش الفكره دي ؟

سمسم / بس يلا .. المهم بس يا حج تكون شايل الكميه كلها زي ما قولتلك .

الحج بدوي / زي ما قولتلك يا سمسم ده نوع محدش بيشتريه اصلا .

سمسم / طيب يا سيدي .. هاتلي بئا 80 عود .

الحج بدوي / طب ما تاخد الكميه كلها وتبئا تقسط الحساب كله .

سمسم / علي عيني والله يا حج .. بس انت ميرضكاش اني اخد حاجه ومعرفش ادفع تمنها .. خلينا قطاعي احسن .

·       نزل الحج بدوي تحت البنك بتاع المحل يجيب الـ 80 عود اللي طلبهم سمسم واستمر الحديث بين سمسم وميمي .

ميمي / اه يا ابن الهبله .. هتشربنا بخور يا سمسم

سمسم / بس ياض وطي صوتك .. ده بخور نادر فيه 6% تبغ .

ميمي / ليـه هو بيره 6% كحول .

سمسم / هو ده بس محدش واخد باله .. اسكت بئا علي ما نخلص .

ـ طبعا الحج بدوي سمع الحوار .. وطلعلهم بحاله جديده

الحج بدوي / والله ياواد يا سمسم انا كنت حاسس انك بتعمل كده .. وانا اقول ياربي بيعمل ايه بالبخور اللي فيه نسبة تبغ ده .. أتاريــــك .

سمسم / أيــه يا حج .. انت هتسيح .. الاختراع ده بتاعي وانت بتسترزق .

يبئا نوطي صوتنا ونعدي الليله ـ أقولك .. هات الكميه اللي عندك كلها ونقسطها .

الحج بدوي / هههههههه .. كمية ايه يا سمسم عيب عليك .. ( البخور ده خلاص خلص )

سمسم / خلص ايه يا عم .. طب هات الـ 80 عود .

الحج بدوي / ماشي يا سيدي مستعد اديك حتي الكميه كلها .. بس تعمل حاسبك وتشخلل جيبك كده ... العود بـ 10 جنيه .

سمسم / ايه يا حج بدوي صلي علي النبي 10 جنيه ايه ده العود بنص جنيه .

ـ يرد الحج بدوي مستهزءا / ده كـان زمــــــان .

يتدخل ميمي قائلا / زمان ايه يا حج ده زمان ده من خمس دقايق بس .

الحج بدوي / بصو .. عشان خاطركو بس انا هديكو البخور ببلاش .. بس بشرط

يرد سمسم مسرعا / أيــــــــــــه ؟

الحج بدوي / نعمل السجاير هنا ونبيعها .. وانا التلتيين وانتو التلت .. قولتو ايه ؟

سمسم / سجاير ايه يا حج اتقي الله .. وانت ترضاها علي نفسك تبيع سجاير ؟

الحج بدوي / لا يا ابني حشي لله .. بس دي سجاير من نوع أخر .. دي سجاير حلال .

ميمي / افتي بئا يا حج واشجينــا

سمسم / حيث انها حلال بئا .. فاظن انه من الحرام ان اختراعي يضيع كده في الهوا .

الحج بدوي / يا سيدي ما عاذ الله اللي ياكل عليك حقك .. انا سداد وشاري .

سمسم / حيث كده بئا يبئا 50-50  نص بالنص يعني .. ده في الفلوس بس .. غير 40 سيجاره ليا انا وصحبي كل يوم .. وبما اننا هنبيع كتير وهنكسب كتير اظن مش كتير عليا صح ولا ايه ؟.

الحج بدوي / وزي ما قولتلك انا سداد ... أوامرك يا دكتور سمسم ؟

سمسم / 5000 ورقة بفره واكياس صغيره مطبوع عليها اسمي واسم السجاير اللي هنختاره لسه .. عشان اضمن حقوقي الفكريه .

الحج بدوي / طيب واسمي جنب اسمك .. يعني بخط صغير كده اتفقنا .

سمسم / مختلفناش .. من 6 الصبح بكره هكون عندك هنا .. وانت تكون جهزت الطلبات دي تمام .

ـــــــــــــــــــــ

مشهد 10

المكان :

في العربيه ماشيين

الحاله :

سمسم وميمي في حالة سرحان وتفكير كامل .

سمسم / انا ازاي مجتليش الفكر هدي .. ازاي كنت هضيع مني فرصه اني اكسب كل الفلوس دي ؟

ميمي / احنا هنصيع .. انت اصلا استغلالي .. انت ناسي انك طبقت عليا الفكر هدي الصبح قبل ما يقولهالك الحج بدوي .

سمسم / بس برضو مفكرتش في الفلوس دي كلها .. انا فكرة في 100 جنيه 50 جنيه .. أي حاجه اجيب بيها بخور أكفي نفسي انما بالشكل ده يا ابني احنا هنعمل في اليوم بتاع ممممممممم 10.000 جنيه ده المتوسط يعني احنا ناخد 5000 والحج بدوي 5 ده غير سجايرنا .

ـ ميمي يسعدني اني اقولك يا صحبي ان احنا انتصرنا علي الدوله .. يبئو يخلو القوانين تنفعهم .. متزعليش يا مصر سمسم هيعيشك تاني

·       يشغل سمسم في العربيه اغنية

·       ( اتبسمي يا بلدنا من تاني _ النصر وخدك وانتي وخداني )

·       ( وان كنت دلوقتي لوحدي يا مصر مش هتلاقيني بكره وحداني )

·       ( فاتبسمي ـ اتبسمي ـ اتبسمي يا مصر من تـــاني )

ـــــــــــــــــــــــــــــ

مشهد 11

المكان :

علي الكورنيش

الحاله :

سمسم وميمي جايبين أيس كريم وبيتمشو ع الكورنيش .

ميمي / طب واحنا هنحدد سعر السيجاره ازاي يا ريس

سمسم / عندك حق انا بفكر في كده برضو .

ميمي / طب احنا ايش عرفنا اذا كانو الناس هيحبو السجاير دي وهيشترو ولا هيرموها في وشنا

سمسم / لا في دي متقلقش .. الناس عايزه أي حاجه شبه المرحومه يمسكوها في ايدهم شالله لو كانت لعبه .

ميمي / بس احنا لو غلينا السعر احتمال منبعش .

سمسم / وممكن العكس .. لو خليناها رخيصه الناس تقول انها أي كلام ومضروبه وميرضوش بيها  .. وبعدين مدام الحاجه غاليه يبئا الناس هتحبها علي طول .. أي حاجه غاليه ليها طعم كده بيغطي علي طعمها الاصلي ( طعم الفلوس يا ريس ) .

·       يسمع سمسم وميمي حوار الاتنين اللي جنبهم كالأتي :

الواد الاول / بص يا صحبي اشتري مني احسن .. مش مهم السعر بقولك جايب علبتين معاه من اوربا وهو جاي امبارح

الواد التاني / بس 10 جنيه للسيجاره كتير برضو .

ـ يدخل سمسم وميمي في الحوار :

سمسم / سلامو عليكو يا رجاله

الاول والتاني / وعليكم السلام ورحمة الله

سمسم / معلش بتطفل عليكم .. بس حسيتا نكو بتتكلمو عن المرحومه .

الاول / وهو في حد في مصر دلوقتي مبيتكلمش عن المرحومه ؟

سمسم / طبعا .. سمعت حاجه كده ان السيجاره بـ 10 جنيه .

التاني / اه ... اشهد انت يا باشا .. ينفع تشتري سيجاره بـ 10 جنيه ؟

ميمي / وليه تشتري سيجاره بـ 10 جنيه .. لما ممكن تشتري 4 بـ 10 جنيه

التاني / انت بتتكلم جد ...... انتو بتبيعو ؟

سمسم / وطي صوتك لنتمسك .. بص احنا في كلية علوم واخترعنا نوع سجاير جديد وزي ما قالك صحبي الـ 4 بـ 10 جنيه .. وعلي فكره دي لسه منزلتش السوق ميعاد اصدارها بكره الصبح ان شاء الله .

الاول / 4 بـ10 جنيه علي كده بئا مضروبه .

سمسم / لا لا حاسب .. احنا مرخصينها لاننا احنا اللي مخترعنها ولاننا شباب زيكم وحاسين بالمعاناه فعايزين نخدم .

التاني / سيبك منه يا باشا المهم .. اسمها ايه السجاير دي ؟

ميمي / اسمها !!

سمسم / اسمها .. اسمها .. اسمها ...

ميمي / اسمها .... سجاير ( الخوابير ) .

سمسم / بالظبط .. يعني تاخد الخابور من دول متحسش بنفسك .

الواد الاول / انتو بتتريقو عليا يلا منك له .. خوابير مين انتو بتشتغلونا فكرينا خرونجات .

سمسم / لا لا متفهمش غلط ... احنا سميناها كده عشان تطلع زي الخبور في وش اللي منعها من الاساس

الواد التاني / الله .. يا سلام ع الاسامي .. ميه ميه يا معلم .. طب منفذ البيع فين ولا بتبيعو انتو ؟

ميمي / الحقيقه احنا لسه بنتفق علي كذا منفذ بس بكره ان شاء الله هتكون في منفذ واحد بس .

الواد التاني قام مطلع ورقه وقلم وقال :

ـ طب ابوس ايدك يا ريس اديني عنوان الخوابير

نهاية الجزء الثاني 

نتقابل في الجزء التالت من الحلقه 

www.fb.com/semsomyat

www.fb.com/asb.abdo

www.abdosami.blogspot.com