تتحدث الحلقه عن تخيل منع السجاير في مصر
ماذا سيحدث
نبدء
مشهد 1
المكان :
المطبخ في بيت ميمي .
الداخله :
من شباك المطبخ هنبص نلاقي ميمي قاعد علي الارض وحواليه ييجي 2000 عود كبريت مطفي وفي ايده علبة كبريت يولع العود ويحطه في بوقه كإنه بيشرب سجاير .
البدايه :
دخل عمرو اخوه عليه .
عمرو / ايه ده ... ايه اللي انت عامله ده ؟
ـ ميردش ميمي عليه ويفضل مستمر في توليع الكبريت والاستمتاع بدخانه .
· يدخل عمرو الحمام خمس دقايق ويخرج يقف قدام ميمي
عمرو / لا اله الا الله .. يا ابني ايه اللي انت عامله ده .
ـ يخرج ميمي دخان الكبريت اللي في بوقه و يرد
· ملكش دعوه يلا .. وسينبي في حالي .
عمرو / أسيبك في حالك ؟ .. انت مش شايف نفسك انت عملت ولا المدمنين .. طب لو ابوك ولا امك صحيو دلوقتي وشافوك كده ايه العمل ؟
ميمي / يعملو اللي يعملوه بئا ... خلاص خربت .
عمرو / لا اله الا الله ... كل ده عشان السجاير اتمنعت في مصر ؟.
ـ يقوم ميمي من مكانه ويبدء يدور علي كبريت جديد بعد ما خلصت العلبه اللي في ايده.
عمرو / يا ابني ارحم نفسك ... طب منا بشرب سجاير زيك ومتأثرتش بإنها اتمنعت ليه ؟.
ـ يقف ميمي ينفخ بعد ملقاش كبريت تاني وخرج من المطبخ ..
· وقف عمرو يمسح في وشه بالفوته اللي في ايده ويتمسكن علي المنظر ونزل ع الارض يلم الكبريت اللي ميمي راميه ده .
ـــــــــــــــــ
مشهد 2
المكان :
أوضة نوم سمسم
الداخله :
من تحت شباك سرير سمسم نرفع راسنا شويه نلاقي سمسم قاعد مربع علي السرير وقدامه حجات بنيه كده بيلفها في ورق بفره .
البدايه :
فرحان سمسم وهو بيلف السيجاره وبيكلم نفسه ..
ـ يمنعوكي ... ال يمنعوكي ال ... هههههههه هو في افضي مننا .
· يخلص سمسم لف السجاير ويلموهم كلهم في طبق قدامه ويوطي علي الطبق يبوسه ويحضنه وهو هيطير من الفرح
ـ يقوم سمسم من علي السرير وفي ايده طبق السجاير طبعا ويبدء يدور علي كبريت في الاوضه فميلاقيش فياخد طبق السجاير ويروح علي المطبخ يولع عين البوتجاز الألي ويقف قدامها يبص علي طبق السجاير :
· مممممممممم ... أولع مين فيكو ... دي ولا دي .. تؤ خلينا في دي ... يوه بئا أي وحده فيكو والسلام .
ـ يولع سمسم السيجاره من شعلة البوتجاز ويخرج من المطبخ متوجها الي أوضته وهو فرحان وبيشرب في السيجاره كإنه لقي لقيه ... وفي ايده طبعااا طبق السجاير .
ـ يدخل سمسم يقعد علي الكمبيوتر ويحط طبق السجاير قدامه فيلاقي ميمي فاتح الايميل وكاتب عليه :
( نفسي في نفس )
ــــــــــــــــــ
مشهد 3
ويبدء الحوار :
سمسم / بـــــــاح الخير يا أختي
ميمي / سمسم !! .. انت فين يلا بتصل بيك مبترضش ليه ؟
سمسم / مكنتش فاضي .. كان ورايا شغل .
ميمي / مكنتش فاضي !! .. ليه يا اخويا بتعمل ايه في المصيبه اللي احنا فيها دي .
سمسم / كنت بخترع حل .
ميمي / لو عندك حل انجدني بيه .. انا من الفجر بشرب كبريت .. ودلوقتي مولع ورق كراسه زي العيال بتوع ابتدائي .
سمسم / ههههههههههههههههههه .. عاذرك عاذرك ... المهم يا سيدي وبعد تعب وسهر وليالي والله فرحنا كده بالغالي .. وتوصلت لحل المشكله دي خلاص .
ميمي / انجدي بيه ابوس ايدك .
سمسم / هتدفع كـــام ؟
ميمي / والله اللي انت عايزه .. بس أشرب سيجاره .
سمسم / يبئا 10 جنيه للسيجاره كويس ؟
ميمي / نعم يا روح امــك !
سمسم / خـلاص يبئا خليك في الكبريت بتاعك .. يا اما بئا تروح مصحه تتعالج .
ميمي / أتعالج من ايه .. دي سجاير اومال لو كنت بشرب حشيش كنت عملت ايه .
سمسم / خـلاص عندي فكره أفضل .. انت تشتري مني الفكره اللي بعمل بيها السجاير .... بــ 100 جنيه .
ميمي / ما تبطل نداله يلا ع الصبح .. انا والله وصلت لمرحلة اني بتخيل أي حاجه قدامي سيجاره .. انا لحد دلوقت مسيح 5 أقلام .
سمسم / ههههههههههههههههههه .. طيب ما تنجد نفسك وتشتري الفكره وهيبئا عندك سجاير كتييييير تولعها .
ميمي / انت عايز تبيع الهوا يا سمسم ؟
سمسم / هو ده اللي عندي .. دي حقوق فكريه يا ريس .. وبعدين بئا سبني اشرب السيجاره الاصلي دي في صمت .
ميمي / والنبي والنبي يا سمسم تقولي أي فكره اعمل بيها ولو نص سيجاره .. انا صحبك يا اخي .
سمسم / معدش ليا أصحاب .. صحبتي اتمنعت .. هتشتري ولا اقفل ؟
ميمي / يا ابن المستغله .. طيب خد 20 جنيه والباقي علي أقساط .
سمسم / لا يا حليوه 100 يعني 100 .. وميعادك لحد الضهريه عشان السجاير هتخلص ومعييش فلوس اشتري الاختراع اللي بعمل بيه .
ميمي / طب ما الـ 20 جنيه نجيب بيها ونعمل سوا .
سمسم / لا يا شق .. هي 100 جنيه وتستناني عند العطار اللي علي باب الشارع اللي ورانا .. بعد أدان الضهر علي طول .
ـــــــــــــــــ
مشهد 4
المكان :
ميمي واقف علي ناصية الشارع مستني سمسم .
حالة الشارع :
كل الناس ماشيه مش شايفه قدامها .. وكل دقيقتين اتنين يتخانقو والناس تروح تسلك الخناقه تقوم الناس تتخانق مع بعضها برضو .
ــــــــــــــــــــ
مشهد 5
المكان :
قدام ميمي .
الداخله : راجل ماشي ومراته شايله حجات كتير كده ماشيه وراه ييجي بخمسه متر .
الست / ما تاخد تشيل عني شويه يا راجل انت
جوزها / امشي يا وليه ومسمعش حسـك
الست / اقف يا راجل انت .. شيل عني شويه ولا معدش فيك حيل من ساعة ما منعو المخروبه دي
جوزها / تصدقي بالله .... كلمه كمان وهطلقك .
الست / تطلقني .. يالهـوي .. عايز تطلقني عشان السجاير اتمنعت يا موكوس ؟
جوزها / اكتمي صوتك يا مره احنا في الشارع .
الست / شارع ولا مش شارع .. انت يومك اسود النهارده معايا .. يالهـوي .
· الراجل ضرب مراته بالقلم علي وشها واستمر صويت الست يرتفع والناس بدءت تتلم ع الخناقه الجديده ...
الست / ورحمة امك منا رجعالك البيت .. غيتوني يا رجاله غيتوني يا خلق هـوه .. بيضربي عشان السجــــاير .
جوزها / هيهيهيهيهيهيهي ... بتشكي لمين يا اختي .. نائبك علي شونه .
تدخل راجل واقف قائلا / وحدو الله يا جماعه ... وانتي يا ست ما تقدري حالة جوزك ما كلنا في سواد من يوم ما منعو المرحومه .
الست / طبعـا .. ما انتو رجاله ناقصه زي بعض .. يلا يا أوساخ يا بتوع السجاير يا اللي من غيرها ولا تسوو .
جوزها / بتشتمينا يا بنت الكلب .. يا رجاله الست دي غلطت فيكو .. وانا بئا مش هتدخل لو حد ضربها
الست / تضربوني .. ورحمة امي لو حد قرب لمدياله بالشبشب علي مناخيره يا شماميين يا بتوع السجايـر .
· تدخل ست شكلها غلط كده وسط اللمه ومعاها شوية نسوان كده استغفر الله العظيم وقفت شويه وراحت قايله :
ـ انتي بتقولي ايه يا وليه ؟
الست / بقول اللي بقوله يا اختي .. لمي النسوان وتعالو شوفو الرجاله .. كرهو حياتهم عشان مش لاقيين الطفح اللي بيشربوه .
جوزها / يا وليه لمي نفسك بئا .
الست البلطجيه تدخلت قائله / بس يا ريس انت بئا .. علي جنب كده يا ابو شنب منك له .. انتي يا وليه متأكده انك بتشتمي الغاليه الله يرحمها ؟
الست / الغاليه !! .. شوبش شوبش .. غالية ايه يا عنيا .. هو انتو كمان معاهم جتكو القرف كلكو .
· ده أنا هطلع عين أمك انتي وجوزك ... نسووووووووووان
ـ يطلع صوت عالي كده أكنه جيش ( هـــــــا )
· هجوووووووووووووووم .
تتلم كل النسوان والرجاله معاهم علي الست هي وجوزها وينزلو ضرب فيهم الاتنين ومحدش سامع أي صوت غير لصوت الضرب وصوت صويت الست وصوت جوزها وهو بيقول
ـ انا معاكو انا معاكو .. أي أي .. انا حشاش والله العظيم انا معاكو معاكوووووووو .
ـــــــــــــــــــــ
نتقابل في الجزء التاني من الحلقه
لحد الميعاد تابعونا علي هذه اللينكات
ليست هناك تعليقات:
إرسال تعليق