ضمن سلسلة حوارات ( الحدق يفهم )
( ع العجله )
سمسم / ازيك ياواد يا ميمي النهارده ؟
ميمي / كويس يا واد يا سمسم النهارده
سمسم / شوفت اللي حصل امبارح معايا
ميمي / ايه اللي حصل يا اخويا
سمسم / شوفت حتت حلم امبارح بس ايه .. عجب
ميمي / ده علي اساس اني بفسر احلام يعني
سمسم / تصدق انك عيل تيت ياض بشركك معايا
ميمي / ماشي يا عم شير
(share)
ها ايه الحلم ؟
سمسم / مش هتصدق
ميمي / لاء هصدق
سمسم / بص يا سيدي وما سيدك الا انا … حلمت ان انا واقف في طابور عيش طويل اوي
ميمي / قول والله
سمسم / اه والله
ميمي / وبعدين يا اخويا كمل
سمسم / ولعلي سيجاره معاك الاول
ميمي / وانا هسمعلك ولا اولعلك ….. ماشي يا اخ خد
سمسم / تسلم .. المهم يا سيدي وما سيدك الا انا … كان واقف ورايا مين بئا
ميمي / مين بئا !!
سمسم / انت طبعا يا حبي
ميمي / احيه علي اخر الزمن وقفتني في طابور عيش
سمسم / ياعم ده حلم حلم … انت اخرك تقف علي رجلك المهم … وقدامي مين بئا
ميمي / مين بئا !!
سمسم / محدش .. كنت انا اللي واقف قدام الشباك علي طول
ميمي / طب انجز عايزين نشتري ونروح بيوتنا احنا مش فاضيين زيك
سمسم / بالظبط ده اللي قاله الراجل اللي كان واقف وراك .. قبل ما يمد ايده ويضربك علي قفاك
ميمي / أي … يضربني انا ليه ياعم
سمسم / مهو انا استغربت برضو زيك كده وقولت لاء صحبي ميضربش ورايا قومت مخليك انت اللي قدام وانا رجعت مكانك
ميمي / طب وبالنسبه للراجل اللي ضربني ؟
سمسم / لاء مكلمتوش اصله كان عضلات وسمانه وحجات انت عايزني اخد علي قفايا زيك
ميمي / اه يا ابن السحل
سمسم / المهم المهم .. وقفت انت قدام الشباك وانا وراك
ميمي / وبعدين بئا ايه القرف ده … ما تخلص يا زفت
سمسم / بالظبط ده اللي قالته الست اللي كانت واقفه جنبنا قبل ما تتف عليك
ميمي / وبعدين بئا ايه القرف ده اشمعنا انا اللي بنضرب وبيتف عليا
سمسم / مهو انا استغربت زيك كده بالظبط ومسكتش
ميمي / وعملت ايه يا اخويا ؟
سمسم / رجعتك مكانك تاني وروحت واقف انا قدام الشباك تاني
ميمي / مش هنخلص في ام اليوم ده انجز … ومتقوليش بالظبط ده اللي قاله صاحب الطابونه قبل ما يقلعني البنطلون
سمسم / لاء لاء محصلش انا خلاص حافظت عليك وقولتلهم انك تبعي ومحدش كلمك بعد كده
ميمي / لاء فيك الخير
سمسم / المهم يا سيدي وما سيدك الا انا … فتح الشباك وابتدت الطابونه تجهز عشان تبيع
ميمي / نعم يا اخويا هو كل ده ومكنتش شغاله اومال كنا هناك ليه
سمسم / منا استغربت زيك كده برضو وسألتك السؤال ده
ميمي / يا سلام … طب كويس وانا قولتلك ايه بئا
سمسم / يدوبك سالتك السؤال لقيت الراجل اللي ورانا قام قايل ( انتو مش هتخلصو في يومكو يا ولاد الـــــ وقام ضربك علي قفاك تاني
ميمي / ابن الجزمه الواطي … متعرفيش مين ابن الجزمه ده عشان اخد حقي منه هو بيستغل ان انا كنت نايم يعني وكمان مش في حلمي في حلم واحد صحبي واكيد كان عيار النوم زايد شويه
سمسم / وحياتك قولت لنفسي نفس السؤال .. هو مين الراجل اللي قاعد يضربك علي قفاك ده
ميمي / طب وعرفت ؟
سمسم / لاء انت اللي حاولت تعرف وروحت مزعق وقايله .. ( انت مين يا راجل انت عشان تضربني علي قفايا )
ميمي / طبعا قام ضارب تاني
سمسم / لاء طبعا خلاص يا ابني انا كنت اتصرفت
ميمي / وعملت ايه يا اخويا
سمسم / عملت الصح طبعا جبتك انت قدام ورجعت وقفت مكانك تاني
ميمي / تصدق انك عيل ابن ستين في سبعين انا غلطان اني واقف مستنيك هتقول ايه
سمسم / ده بئا بالظبط اللي قالته الست اللي جنبنا بس قالتلك انها واقفه مستنياك تشتري وتمشي وقامت خبطاك بالقلم علي وشك
ميمي / انا بقيت ملطشه ولا ايه ….. مين الناس دول
سمسم / يا ابني انا مسكتش
ميمي / مسكتش .. كل ده ومسكتش انا اتمرمت في حلمك يا سمسم وتقولي مسكتش .. والمصحف لو حد اغتصبك قدامي في حلمي منا متكلم
سمسم / لاء لاء حاسب علي كلامك انت ناسي واحنا واقفين ورا انا خدتك وطلعنا قدام ليه
ميمي / كمان ؟ … ليه يا اخويا
سمسم / كان في راجل واقف وراك وكده يعني
ميمي / ولا .. اتلم لألمك
سمسم / خلاص خلاص المهم يا سيدي وما سيدك الا انا .. بعد ما الست ضربتك علي وشك
ميمي / طبعا رجعتني مكاني ودخلت انت قدام
سمسم / اسم الله عليك … واشتريت العيش وقومت خارج من الطابور انا وانت
ميمي / نعم يا اخويا طب وانا مجبتش
سمسم / لاء انت كنت جاي معايا كده بس .. يعني علي اخر الزمن ميمي هيشتري عيش ده حتي عيبه
ميمي / اه يا ابن الفاضيه … وسبتني انضرب كل ده من غير قضيه اصبر نفسي بيها .. طلعت من المولد بلا حمص يا سمسم
سمسم / بص يا ميمي بصراحه بئا ده مش حلم
ميمي / اومال ايه
سمسم / انا سمعت امك امبارح بتشتكي لامي انها بتنزل الصبح تجيب العيش بنفسها وان عيالها مبدولين مش قادرين ينزلو بدالها
ميمي / وانت مال امك بالموضوع ده
سمسم / يا ابني امي صاحبة امك وبيدردشو عادي
ميمي / وانت بئا قولت تحلها انك تخشلي بالموضوع ده
سمسم / لاء يا سيدي مش كده انا بصراحه عايز اوصلك رسالتين اولهم : متسكتش لما تنضرب من اي حد مهما كان مين حتي لو مكنش ليك قضيه
ميمي / والتاني ؟
سمسم / انك تعرف ان امك تعبانه وعايزه حد ينزل يجيب العيش بدالها
ميمي / سيبك من الكلام ده كله ……… أي
سمسم / ايه
ميمي / معرفش في طوبه اتزقلت عليا اكيد عيال ولاد تيت صغيرين بيلعبو لعبتهم الشهيره ( حدف طوب واجري ودوب )
سمسم / طب اقف ولا ايه ؟
ميمي / اه ياعم اقف وهاتني قدام وانت تعالي ورا
والحدق يفهم
تابع المدونه واخبارها علي الفيس بوك
انضم لصفحة الكاتب : عبدالرحمن سامي علي الفيس بوك
ليست هناك تعليقات:
إرسال تعليق