الجزء الاخير من حلقة
- ميمي بيحب -
تابع الاجزاء الاولي من الحلقه علي هذه الروابط
ــــــــــــــــــــــــــــــــــــــــــــــــــــــــــــــــــــ
نرجع بسرعه لسمسم وسومه في قاعدتهم
سومه / هما العيال دول راحو فين مش باينين
سمسم / سيبك منهم المهم قولتي ايه ؟
سومه / يا ابني صعب اني اخرج بليل النهارده بالذات
سمسم / ليه يعني ؟
سومه / عشان بابا ايمان وماماتها معزومين ع الغدا عندنا ومش هيمشو اكيد غير بعد العشا
سمسم / ما انت قولتي ان ايمان بتنام معاكي
سومه / ايوه بتنام معايا هما ساكنين فوقنا وانت عارف بس مش لدرجة اننا نخرج نتسحب بليل
سمسم / ومين قالك تتسحبو انتو عادي يعني هتخرجو تتفسحو مع بعض وكده ومحدش هيقولكم حاجه .. وكمان يعني مش شرط يكون بليل اوي احنا ممكن نخليها المغرب ونقعد مع بعض ساعتين تلاته
سومه / خلاص سيب الموضوع ده عليا انا هفكر وهرد عليك اما اروح واتشاور مع ايمان
سمسم / ليه ما تكلميها دلوقت
سومه / خلاص بئا قولنا هنتصرف الله
سمسم / ماشي يا عم اتقل علينا اتقل
سومه / اتقل اه اهو برضو احسن من اني اقفل في وشك التليفون
سمسم / خلاص بئا يا ريس عديها ما انت يما عملتها
سومه / ماشي يا سيدي
ــــــــــــــــــــ
يقوم سمسم وسومه يدورو علي ميمي وايمان يلاقوهم قاعدين في الجونينه ونازلين ضحك
سمسم / اوبا .. الوضع شكله يطمن
سومه / منا قايلالك يا ابني
سمسم / طب تعالي بئا نرزل عليهم شويه
يدخل سمسم وسومه عليهم ويقاطعوهم
سمسم / الله الله .. قاعدين ندور عليكو بقالنا ساعه وانتو هنا ؟
ميمي / هيهيهيهي .. ظريف ومتصلتش ليه لما انت عايزنا هه
سومه / ههههههههههه مش معانا رصيد .. وبعدين المهم عايزين ناكل
ميمي / ههههههههههههه انا مش عايز اكل خلاص ( ويبص لايمان )
سمسم / المهم المهم .. انا وسومه هنخرج بليل ايه رائيكم تخرجو معانا
ميمي / طبعا انا موافق
سمسم / بس ياض مبكلمكش انت .. انت لازق في أي حاجه كده انا بتكلم عن ايمان
ميمي / طيب مهي ايمان هتييجي برضو
ايمان / لا ياجماعه احتمال كبير مينفعش اخرج بليل عشان احنا مسافرين الصبح الغردقه
ميمي / غردقه مقولتليش يعني
ايمان / هو احنا اتكلمنا في حاجه عشان اقولك
سمسم / نعم .. كل ده ومتكلمتوش في حاجه
سومه / بصو انا هحلهالكم .. بصي يا دندش انا هستأذن من باباكي ومامتك ونقولهم ان احنا مثلا هنروح سينما ولا حاجه
ايمان / هنكدب يعني
ميمي / وتكدبو ليه طب ما فعلا نروح سينما مفيهاش حاجه
ايمان / بصو كلمو سومه وهي بئا تتصرف
سمسم / يعني معندكيش مانع ؟
ايمان / انا النهارده معنديش أي حاجه خاااااااااااالص
سمسم / ميمي / سومه / ايمان / هههههههههههههههههههههههههههههههه
ــــــــــــــــــــــــــ
يتقابلو بليل بعد ما عملو الحبتين عشان يخرجو ويتفقو انهم يروحو يتعشو في مطعم ع النيل بئا وحركات
سمسم / ها هنروح فين
سومه / بص الصراحه يعني انا مش عايزه اكل أي حاجه انا متغديه النهارده لما بطني شو كبرت ازاي
ميمي / وريني كده
سمسم / ولا .. لم نفسك .. وانتي يا اختي بطنك ايه اللي كبرت
ايمان / انا عايزه أكل بيتزا ايه رائيكم ؟
ميمي / انا جتني فكره احسن
سمسم / ايه هي يا فالح
ميمي / نروح نضرب كشري
سومه / الله .. هو ده
سمسم / هو ده ايه انتي مش بطنك كبرت
سومه / لاء انا بضعف قصاد الكشري
ميمي / خلاص انا هوديكو عند محل ابن لذينه بجد تحفه
ـــــــــــــــــــــــ
يركبو العربيه مره تانيه وينطلقو علي العنوان المرجو
يخشو المحل ويقعدو ويطلبو ويبدء في الاكل وسط هزار مستمر وضحك متصل
يخلص ميمي الاكل اول واحد
ميمي / ياااااااااااه .. احلي اكله في الدنيا انا هطلب كماله .. بس هروح ادخل الحمام واجي تاني
يروح ميمي الحمام
سومه / ايه رائيك يا دندش .. بذمتك مش احسن مـ البيتزا والكلام الفارغ ده
ايمان / بس دلوقت انا بوئي مولع نار .
سمسم / وانا حاسس ان شعري وقف ودماغي كبرت
سومه / هههههههههههههه .. مش قد الشطه بتاكلوها ليه .. أما عالم غريبه صحيح
ييجي ميمي متسربع ويوطي علي كتف سمسم ويقوله
ـ سمسم قوم حالا عايزك
سمسم / استني اما اخلص واقعد كل بئا الكماله بتاعتك انا طلبتهالك اهيه
ميمي / قوم حالا اخلص احنا في ورطه
سومه / ايه بتتوشوشو في ايه
ميمي / هه .. لا ابدا انا بس عايزه في كلمتين علي جنب كده
ايمان / ههههه لو مش معاكو فلوس نحاسب احنا عادي
ميمي / لا خالص مش كده انا اتفهمت غلط ولا ايه .. ما تقوم يا زفت اخلص
يقوم سمسم وميمي يروحو الحمامات وسومه وايمان في حالة استغراب
سمسم / ايه يا زفت جايبني علي ملا وشي ليه .. ايه اللي حصل
ميمي / مصيبه يا سمسم مصيبه
سمسم / مصيبه !! .. يا نهار اسود مصيبة ايه تاني
ميمي / انت عارف مين هنا
سمسم / مين ؟
ميمي / ساره ومريم
سمسم / مين ساره ومريم دول
ميمي / دول اخوات كنت ماشي معاهم الاتنين وسبتهم من شهر بعد ما عرفو ان انا بلعب عليهم الاتنين
سمسم / طب وفيها ايه .. وبعدين يا ابن التيت ماشي مع اختين انت حوت يلا
ميمي / ياعم والله الاتنين كانو عارفين بس حصل مشكله كده خلتهم وقعو في بعض وبعد كده اتفقو عليا .. انت لو تشوف عين ساره وهي بتبصلي بغل ولا مريم احيه مريم ديه هبله وتعمل أي حاجه احنا لازم نخرج من هنا .. بص انت تروح تاخد سومه وايمان وتخرجو وانا هخرج بعدكم مينفعش نخرج سوا
سمسم / طب بس اهدا كده هتودينا في داهيه اصبر اما نفكر هنعمل ايه
ميمي / زي ما قولتلك كده يلا مفيش وقت العيال دي وربنا ميضمنوش
سمسم / طيب خليك هنا وانا هخرج احاسب واخد سومه وايمان ونستناك في العربيه وربنا يستر
ميمي / ماشي رن عليا اول ما تخرج
ـــــــــــــــــ
خرج سمسم ثانيتين ورجع جري تاني لميمي
سمسم / مصيبه يا ميمي مش هتصدقها انت نهارك اسود
ميمي / ده اللي كنت خايف منه .. اوعي يكون اللي في بالي
سمسم / هو يا اخويا .. البتين قاعدين مع سومه وايمان
ميمي / يا نهار اسووووووووود .. طب اجري اجري اجري
سمسم / اجري اروح اعمل ايه الله يخربيتك
ميمي / اجري اعمل أي حاجه متسبهومش يتكلمو معاهم
سمسم / بص بئا بلاويك دي انت اللي بتعرف تتصرف معاهم اخرج انت وخلاص
ـــــــــ
يخرج ميمي وسمسم مع بعض يروحو يلاقو ساره ومريم قاعدين مكانهم قدام سومه وايمان وقاعدين يتكلمو معاهم
سمسم / الله مين .. ساره ومريم ايه الصدف السعيده دي
مريم / صدف سعيده طبعا .. الله ميمي ازيك
ميمي / كويس كويس ... معلش مضطرين نمشي كان نفسي اقعد معاكم شويه بس معلش
ساره / تمشو ودي تييجي مش تعرفنا علي اصحابكم
سمسم / اصحاب مين يا ساره بس ..
ينغزه ميمي .. ( دي مريم )
سمسم / اصحاب مين يا مريم دي سومه خطيبتي ودي ايمان صحبتها
مريم / كويس والله وطبعا ده ميمي صاحبكو ههههههههههههه
ميمي / هههههه ظريفه مريم طول عمرك .. معلش بئا مضطرين يلا يا ايمان يلا يا سمسم هات سومه
ايمان / مش تعرفنا الاول قبل ما نمشي علي الابلوات
ميمي / دول دول دول
سمسم / دول ولاد خالتو
ميمي / بالظبط بالظبط .. دول ولاد خالك بالظبط .. خالتي خالتي مش خالي صح صح
مريم / ايه يا ميمي مالك متوتر ليه وبعدين فينك مبتسألش علي ولاد خالك ليه ده احنا لينا عليك حق يا راجل
ميمي / معلش بئا انتو عارفين انا مشغول قد ايه
ساره / طبعا .. ما احنا فرحنا برضو ان انت فضيت وجاي تاكل فقولنا والنبي ما احنا معديين الفرصه دي الا اما نسلم عليك .. ده انت ليك علينا حق برضو واحنا مبننساش الحق
مريم / والاموره ايمان دي بئا تبئا مين
ايمان / ابئا خطيبته
ساره / يااااااااااااه والله قولت كده بذمتك يا مريم مش قولت كده
مريم / حصل يا اختي .. ده حتي لايقين علي بعض
ساره / لا لا لا بلاش كدب يا مريم لايقين ايه احنا نقول الحق ونرميه البحر
سمسم / ايه يا حلوين انتو جايين تلطفو الجو ولا ايه
ميمي / انا هشتكيكو لخالتي ماشي
مريم / ههههههههههههه .. وياترا بئا لسه فاكر نمرة خالتك وعنوان شقة خالتك ولا افكرك
ايمان / ايه اللي بيحصل ده
سومه / ايمان يلا نخرج
مريم / استنو بس .. تخرجو تروحو فين .. احنا بنات زي بعض وميضرناش نخدع بعض
ساره / ده كلام كويس .. احنا مش جايين نبوظ الليله ولا حاجه بس مدام الاخ ميمي خطب يبئا لازم تكشفو علي حقيقته وبالمره نردله الحق اللي لينا عنده
ميمي / بس بئا .. بس .. ايمان متصدقهومش دي بنات واطيه
مريم / واطيه.. ورحمة امي لافضحك قدامها
سومه / بس سفاله بئا وقلة ادب ايه المسخره دي .. سمسم يلا نمشي
يخرج ميمي جري من المكان وسومه وايمان يشيلو الشنط بتاعتهم وسمسم واقف ينفخ لساره ومريم وهما خارجين خلاص تقول مريم
ـ علي فكره يا أنسه خطيبته عايزه اقولك حاجه اخيره
تقف ايمان فتشدها سومه عشان يخرجو فتشد ايمان ايدها من سومه وتبص لمريم
مريم / احنا مش قصدنا نزعلك .. بس احنا بنوعيكي .. احنا عارفين ان خطيبك قالك انه كان ليه علاقات ببنات كتير .. وطبعا انتي فهمتي ان العلاقات دي علاقات حب .. بس اللي سيادتك متعرفهوش انها اكبر من كده بكتير .. كانت علاقات وساخه ولا تحبي نوضح اكتر من كده
ساره / لالالالالالالالالا .. ايه يا مريم بس هتفضحينا .. خلاص هي فهمت
ايمان / عندكم حق ان انا اتخدعت .. بس ده كان بمزاجي والحاجه اللي انا متأكده منها دلوقت ان انتو أفدتوني مش ضرتوني .. أي نعم حرقتو دمي شويه .. بس ده ميمنعش اني اقولكم انكم بنات سافله ومتربتوش ومعندكوش دم
تجري ايمان عليهم تضرب فيهم وهما يضربو فيها يخش سمسم يخرج ايمان ويتلم المحل كله يفركش الدور ده وتخرج ايمان وسومه وهما بيعيطو الاتنين وسمسم يوصلهم بالعربيه وطبعا ميمي فص ملح وداب
ـــــــــــــــــــــ
تسافر ايمان تاني يوم الصبح هي وسومه مع اسرتهم للغردقه وتنقطع اخبارهم حتي سومه مبقتش تكلم سمسم
اسبوع اتنين تلاته وسمسم وميمي تايهين ومحدش فيهم عارف يكلم حد
لحد ما ييجي يوم وسومه تتصل بسمسم ويرجعو يتكلمو عادي وفهمتو انها ندمت انها تدخلت في موضوع زي ده زي ما قالتله في الاول واتسوت كل الامور بينهم وايمان طبعا كرهت حاجه اسمها ميمي
ــــــــــــــــــــ
صباح يوم من الايام
سمسم نايم تدخل مامته تصحيه
الام / يا سمسم سمسم
سمسم / ايه يا ماما
امه / ميمي بره ادخله
سمسم / دخليه واعمليلي فطار بعد اذنك
امه / حاضر
يتخيل سمسم ان ميمي لسه عايش دور المجروح وهيدخل كعادته اليومين اللي فاته يقعد جنبه ع السرير ويفضلو ساكتين لحد ما يزهقو وميمي يروح
يتفاجئ سمسم بدخلة ميمي
ميمي / صباح الصباح يا ريس .. كل ده نوم الساعه بقت 3
سمسم / اقعد اعملك أي حاجه علي ما ادخل اخد دش
ـ علي فكره سومه كلمتني امبارح وهي مش زعلانه منك بتقول انها كانت عارفه ان انت كده واكتر وان انت هتفضل في حياتنا عادي صاحبنا بس بتقولك متفكرش تاني ان ايمان ممكن ترجعلك
ميمي / وايه كمان
سمسم / وبس
ميمي / المهم النت اشتغل عندك ولا لسه فاصل
سمسم / اشتغل
يدخل سمسم الحمام ويقعد ميمي ع الكمبيوتر ويطلع علبة السجاير يولع السيجاره
يخرج سمسم
ميمي / بقولك ايه يا سمسم .. ايه رائيك نروح الغردقه
سمسم / نروح فين يا اخويا
ميمي / الغردقه الامتحانات فاضل عليها كتير نروح نقعد اسبوع ولا حاجه
سمسم / يا ميمي ابوس ايدك انا قولتلك من الاول ايمان مش هتكمل معاك
ميمي / بصراحه معدش ليا وش اقولك ساعدني والحركات دي .. بس اقف جنبي المره دي كمان
سمسم / بص يا ميمي من الاخر كده .. اني اساعدك تاني تكلم ايمان انساها
ميمي / بس انا مش عايز اكلمها انا عايز اشرحلها وجهة نظري .. وبعدين هي اللي خدعتني هي قالتلي انها عرفت من سومه ان انا عرفت بنات كتير وانها هتسامحني ومش هتعاقبني علي ماضيا
سمسم / مهو اللي حصل ده مكنش شويه
ميمي / مكنش شويه عليها ولا عليا
سمسم / انت متعرفش اما انت خرجت يا ابني ايمان كان منظرها ايه
ميمي / ياعم انت حكيتلي كتير اللي حصل وبعدين انت مصدقني ان انا عمري ما لمست بنت بالذات الاتنين دول ازاي يعني هلمس واحده في عنوان بيتهم واختها معاها مفيش عقل يعني انا لو كنت فضلت واقف وسمعت الكلتين دول كنت اديتهم بالجزمه .. بس معاها حق ايمان تكرهني برضو
سمسم / بس متقولش عمري ما لمست بنت دي
ميمي / انت كمان هتعملي زيهم .. والله والله والله انا اكتر حاجه عملتها ان انا بوست بس
سمسم / والنبي
ميمي / يا سمسم انا بضعف قدام الحريم ما انت عارف .. بس والله عمري ما ضعفت اكتر من كده ولا عمري روحت لحد شقه ولا الكلام ده انا اخري اظبط كلام واعيش وبس
سمسم / بص يا زفت عشان نخلص من ام الموضوع ده .. كلام تاني مع سومه عشان انت تكلم ايمان مش هيحصل
ميمي / طب مهو انا عشان مقولكش كده بقولك نروح الغردقه
سمسم / ميمي عندي فكره أفضل
ميمي / الحقني بيها
سمسم / تنسي الموضوع ده دلوقت خاااااااااالص .. وترجع ترتب حياتك من جديد ولو ليك نصيب في البت دي تاني .. اكيد هترجعلك
ميمي / وعد انك تقف جنبي لما الظروف تتحسن واما انا كمان اتحسن
سمسم / مع اني زهقت منك ومن تحسناتك .. بس وعد
ميمي / تعالي بئا شوف صورة البت دي لسه ضيفاني امبارح
سمسم / تاني يا ميمي .. ده احنا لسه بنوعد بعض
ميمي / خلاص خلاص .. اديني عملتلها ديليت كمان .. سمسم . انت وعدت ومتخلاش بيا
سمسم / وعدت بس مش دلوقت خالص .. لازم نبدء الحكايه من جديد وفي ظروف افضل وفي ورقه بيضه
ميمي / وانا موافق
يرن تليفون سمسم وسومه هي اللي بتتصل
سمسم / استني اما ارد علي سومه
ـ الو .. ايوه يا حبيبتي ايه الاخبار .... عارفه مين قاعد معايا ؟ .... ميمي ... كنا عايزين نساعدو يا سومه عشان يرجع لايمان
يشيل سمسم التيلفون من علي ودنه ويقول
ـ انا قولت كده برضو
( قفلت السكه في وشه )
وبكده خلصت الحلقه كلها
في حلقه تانيه هتكون ايمان ضيفه فيها لكن مش دلوقت
الحلقه الجايه ان شاء الله مفاجأه
هتشوفو اليوميات بشكل مختلف خالص واوعدكم هتكون افضل ميت مره
وهتنزل حلقه كامله كل اسبوع في يوم واحد يعني معدش هتبئا علي اجزاء
لكن هتكون عباره عن pdf
هتحملوه بسرعه وببساطه واللي مبيعرفش يحمل والكلام ده متقلقوش انا هشرحلكم كل حاجه ببساطه وان شاء الله تنبسطو اوي بالحلقات اللي جايه لانها هتكون محترمه بجد
الحلقه الجايه اسمها
( سجاير الخوابير – خير بديل )
كل اللي مهتم بالسجاير سواء بيحبها او بيكرها يستني الحلقه ويتخيل معايا كده لو السجاير اتمنعت في مصر ايه اللي ممكن يحصل ؟
وبالذات لميمي وسمسم اللي مدمنين سجاير ..
الحلقه الجايه كوميديا من الدرجه الاولي
استنوني وتابوعنا علي اللينك دي كالعاده
ليست هناك تعليقات:
إرسال تعليق